Lög Ljósmyndarafélags Íslands - Breytt 13.3.2024

Lög Ljósmyndarafélags Íslands

1. GREIN – HEITI OG VARNARÞING

Heiti félagsins er Ljósmyndarafélag Íslands. Heimili þess og varnarþing er í Reykjavík. Kennitala Félagsins er 441077-0179.

Félagið er aðili Samtökum iðnaðarins og Samtökum atvinnulífsins fyrir hönd þeirra atvinnurekenda innan félagsins sem uppfylla skilyrði þessara samtaka um aðild.

2. GREIN – SKILYRÐI TIL AÐILDAR

Félagsmenn geta þeir orðið sem lokið hafa viðurkenndu námi í ljósmyndun og/eða hafa sannanlega atvinnu af ljósmyndun.

3. GREIN – TILGANGUR

• Tilgangur félagsins er að gæta faglegra og stéttarlegra hagsmuna félagsmanna, og skal félagið vinna að framgangi málefna, sem það telur sig og félagsmenn sína varða, m.a. á eftirfarandi hátt:

• Að halda fundi með upplýsandi fyrirlestrum og öðru því er að fræðslu og gagnsemi lítur.

• Að halda sýningar á ljósmyndum og ýmsum nýjungum, sem tengjast iðngreininni.

• Að halda sérstaka skemmtifundi og samkomur fyrir félagsmenn.

• Að efla samvinnu meðal ljósmyndara, en stuðla jafnframt að eðlilegri samkeppni þeirra í milli á sem heilbrigðustum grundvelli.

• Að vinna að því að ná sem hagkvæmustum kjörum fyrir félagsmenn á efnisvöru og tækjum.

• Að stuðla að sem farsælastri framþróun í fræðslumálum iðngreinarinnar, jafnt á bóklega sviðinu sem hinu verklega.

4. GREIN - ÁRGJALD

Félagar skulu greiða félagsgjald til félagsins í samræmi við ákvörðun aðalfundar ár hvert og fylgja gjalddagar innheimtu félagsgjalda Samtaka iðnaðarins og Samtaka atvinnulífsins eftir því sem við á skv. samningi þar um. Stjórnarmenn, heiðursfélagar og þeir sem hafa náð 67 ára aldri skulu vera gjaldfrjálsir. Félagsaðild er greidd fyrir fram og uppsögn á félagsaðild tekur gildi við næsta gjalddaga.

5. GREIN – INNTAKA NÝRRA FÉLAGA

Inntökubeiðni skal útfylla á vef félagsins. Stjórn félagsins er heimilt að taka inn nýja félaga, uppfylli þeir sett skilyrði skv. 2. grein. Stjórn skal halda utan um félagatal.

 6. GREIN – STJÓRN OG NEFNDIR

Stjórn félagsins skulu skipa sex félagar og skulu minnst þrír vera búsettir í Reykjavík og nágrenni. Stjórn skal vera kosin á aðalfundi til tveggja ára senn í senn. Formaður er kosinn sérstaklega en stjórn skipar sjálf í hlutverk varaformanns, gjaldkera og ritara úr kosnum stjórnarmönnum. Enn fremur skal kjósa í fastanefndir félagsins og skoðunarmenn reikninga. Stjórn skipar í uppstillinganefnd tímalega fyrir aðalfund sem skal stilla upp tillögu að nýrri stjórn, endurskoðendum og nefndarmönnum. Forðast ber að skipta út of mörgum í einu til að halda samfellu milli ára og tryggja upplýsingaflæði milli stjórna.

Atkvæðagreiðsla á aðalfundi er alla jafna í formi handauppréttingar, en getur verið skrifleg samþykki meirihluti aðalfundar þá aðferðar getur einnig kallað til fundar ef þurfa þykir. Stjórnarfundir eru lögmætir ef meirihluti stjórnar er mættur. Stjórn hefur æðsta vald í málefnum félagsins milli aðalfunda og/eða félagsfunda. Meirihluta stjórnar þarf til þess að binda félagið við allar meiriháttar fjárhagslegar skuldbindingar.

7. GREIN - AÐALFUNDUR

Aðalfundur skal haldinn á fyrsta ársfjórðungi ár hvert. Fundarboð ásamt dagskrá skal sendast skriflega til félagsmanna minnst 2 vikum fyrir aðalfund. Rétt til fundarsetu hafa aðeins félagsmenn, enda séu þeir skuldlausir við félagið.

Aðalfundur er löglegur sé löglega boðað til hans.

Lögum má aðeins breyta á aðalfundi með 2/3 atkvæða meirihluta mættra félagsmanna, enda hafi tillögur um lagabreytingar verið kynntar í dagskrá, sem fylgir fundarboði. Störf aðalfundar skulu vera sem hér segir:

1.       Skýrsla stjórnar

2.       Reikningar félagsins

3.       Lagabreytingar, ef einhverjar

4.       Ákvörðun árgjalds

5.       Kosning stjórnarmanna og skoðunarmanna reikninga skv. 6. gr.

6.       Kosning í fastanefndir félagsins skv. 8. gr.

7.       Önnur mál

8. GREIN - NEFNDIR

Stjórn félagsins hefur heimild til að skipa sérstakar starfsnefndir til að fjalla um einstök mál. Þá skulu í félaginu starfa eftirtaldar fastanefndir:

Skemmtinefnd. Minnst þrír stjórnarmenn hafa umsjón með dagskrá félagsins, kynnir viðburði og fylgir þeim eftir og velja sér félagsmenn til aðstoðar við skipulag dagskrár.

Laganefnd, skipuð þremur félögum. Laganefnd yfirfer lög félagsins, tekur við ábendingum og tillögum um viðhald þeirra og breytingar og leggur fyrir á aðalfundi ef þurfa þykir. Nefndarmenn eru kosnir af aðalfundi og velja formann nefndarinnar úr sínum hópi.

Stjórn skal skipa siðanefnd með þremur félögum ef aðstæður krefjast skv. 11. grein.

Skoðunarmenn reikninga. Tveir félagsmenn skulu kosnir skoðunarmenn reikninga og skulu þeir yfirfara alla reikninga félagsins fyrir aðalfund. Fundurinn er boðaður með tveggja vikna fyrirvara samkvæmt lögum félagsins. Athygli er vakin á því að rétt til atkvæðagreiðslu hafa aðeins félagsmenn, enda séu þeir skuldlausir við félagið.

9. GREIN - MENNINGARSJÓÐUR

Innan félagsins skal starfræktur Menningarsjóður. Hlutverk sjóðsins skal vera að stuðla að framþróun iðngreinarinnar. Stjórn félagsins fjallar um verkefni Menningarsjóðs og ákveður úthlutanir úr sjóðnum.

10. GREIN - MYNDSTEF OG LJÓSMYNDAMIÐSTÖÐ ÍSLANDS

Félagsmenn í Ljósmyndarafélagi Íslands verða sjálfkrafa félagsmenn í Myndstefi, Myndhöfundasjóði Íslands, og Ljósmyndamiðstöð Íslands kjósi þeir það við nýskráningu í Ljósmyndarafélag Íslands. Myndstef gegnir því hlutverki að vernda höfundarrétt félagsmanna vegna birtingar á verkum þeirra til almennings og vegna annarrar hliðstæðrar notkunar. Félagsmenn öðlast öll réttindi og skuldbinda sig til þess að hlíta öllum skyldum sem fylgja aðild að Myndstefi.

Ljósmyndamiðstöð Íslands skal mynda samstöðuvettvang, gæta sameiginlegra hagsmuna ljósmyndara og efla samvinnu milli ljósmyndara sem starfa á Íslandi. Félagið er sameiginlegur vettvangur allra ljósmyndara vegna málefna er snerta höfundarrétt alls fagsins, bæði hérlendis sem og erlendis. Að lokum skal félagið fylgjast með þróun styrkjaumhverfis og starfslaunasjóða, og annarra opinberra málefna og hagsmuna er snerta félagsmenn og félagið. Félagið starfar ávallt með sameiginlega hagsmuni allra ljósmyndara að leiðarljósi.

11. GREIN – BROT Á LÖGUM

Brjóti einhver félagsmanna í bága við lög félagsins og löglegar samþykktir þess eða vinni á einhvern hátt gegn virðingu þess eða geri sig á einhvern hátt sekan, svo að ætla mætti að hann væri óverðugur í félaginu, skal siðanefnd, sem skipuð er samkvæmt heimild 8. gr. taka mál hins brotlega fyrir og skila áliti til aðalfundar eða félagsfundar.

 12. GREIN - SAMVINNA

Félagsmenn skulu hafa góða samvinnu sín á milli. Þeir skulu sýna stéttarbræðrum sínum tillitssemi og leitast við að hegða sér þannig, að samrýmanlegt sé hagsmunum þeirra beggja. Stjórn félagsins ber að fylgjast með því að ákvæði laga þessara séu haldin.

13. GREIN - GILDISTAKA

Lög þessi eru gerð með hliðsjón af fyrri lögum félagsins frá stofnun þess árið 1926 og af þeim breytingum, sem síðan hafa verið á þeim gerðar, og öðlast gildi á aðalfundi 13.03.2024.